Առցանց հաշվետվության համակարգ
ՀԱՅ
ENG

Հայաստանում մեկնարկել է Opening Extractives ծրագիրը և անցկացվել է աշխատաժողով՝ իրական շահառուների տվյալների ստուգման համակարգերի զարգացման վերաբերյալ

07.06.22
Հայաստանում մեկնարկել է Opening Extractives ծրագիրը և անցկացվել է աշխատաժողով՝ իրական շահառուների տվյալների ստուգման համակարգերի զարգացման վերաբերյալ

2022թ. մայիսի 31-ից հունիսի 2-ը աշխատանքային այցով Հայաստանում էին գտնվում միջազգային Օփեն Օուներշիփ (OpenOwnership) և Արդյունահանող ճյուղերի թափանցիկության նախաձեռնություն (ԱՃԹՆ, EITI) կազմակերպությունների պատասխանատուներ՝ Օփեն Օուներշիփի քաղաքականության գծով տնօրեն Լուիզ Ռասել-Պրիվատան, երկրի գծով համակարգող Փիթեր Լոուն, քաղաքականության գծով խորհրդատու Ալանա Մարկլը  և ԱՃԹՆ-ի միջազգային քարտուղարության երկրի գծով համակարգող Օլեսյա Նեխորոշկոն:

Այցի նպատակները մի քանիսն էին՝ պաշտոնապես մեկնարկել OpenOwnership և EITI կազմակերպությունների կողմից համատեղ իրականացվող Opening Extractives (Արդյունահանող ճյուղերի թափանցիկության ապահովում)  ծրագիրը,  քննարկումներ անցկացնել լիազոր պետական մարմինների պաշտոնյաների հետ ծրագիրը իրականացնելու համար անհրաժեշտ խորհրդատվություն տրամադրելու, տեխնիկական և իրավական աջակցության կարիքները վեր հանելու և աջակցություն տրամադրելու եղանակների շուրջ, ինչպես նաև անցկացնել աշխատաժողով շահագրգիռ կողմերի ներկայացուցիչների համար:

Այցի շրջանակներում աշխատանքային հանդիպումներ են տեղի ունեցել Արդարադատության, Տարածքային կառավարման և ենթակառուցվածքների, Ֆինանսների  նախարարությունների, Պետական եկամուտների կոմիտեի, Կենտրոնական բանկի ֆինանսական դիտարկումների կենտրոնի, ԱՆ իրավաբանական անձանց պետական ռեգիստրի գործակալության,  ԷԿԵՆԳ-ի պաշտոնյաների և պատասխանատուներ հետ, որոնց ընթացքում ձեռք են բերվել հետագա համագործակցության համար կարևոր պայմանավորվածություններ:

Այցի օրակարգի կարևոր բաղադրիչը հանդիսացավ հունիսի 31-ին Երևանի Իբիս Կենտրոն հյուրանոցի կոնֆերանս սրահում անցկացված աշխատաժողովը՝ «Տվյալների ստուգման համակարգերի զարգացման» թեմայով, որին ներկա էին ավելի քան 30 մասնակից: Աշխատաժողովը, որը որակվեց որպես Opening Extractives ծրագրի հայաստանյան մեկնարկ, հավաքել էր այն բոլոր  անձանց/կողմերին, որոնք շահագրգռված են կամ պոտենցիալ դերակատարություն ունեն Հայաստանի իրական շահառուների տվյալների որակի հետագա  կատարելագործման,  ճշգրտության և հուսալիության գործում: Մասնակիցները և միջազգային խորհրդատուները քննարկեցին, թե ինչ է արել մինչ օրս Հայաստանը տվյալների ճշգրտման ուղղությամբ և ինչպես կարող է Հայաստանում օգտագործվել այս ոլորտի միջազգային լավագույն փորձը։

Աշխատաժողովի բացմանը Օփեն Օուներշիփ կազմակերպության քաղաքականության գծով տնօրեն Լուիզ Ռասել-Պրիվատան նշեց, որ Հայաստանի առաջընթացը իրական շահառուների բացահայտման ոլորտում շատ տպավորիչ և ուսանելի է, և Opening Extractives ծրագրի շրջանակներում իրենք պատրաստ են բազմակողմանի աջակցություն ցուցաբերել երկրին՝ իրականացնելու համար այդ ոլորտի հետագա զարգացումն իրական շահառուների հավաքագրվող ճշգրիտ տվյալների որակն ապահովելու համար:  

 Իր հերթին, Opening Extractives ծրագրի հայաստանյան համակարգող՝ Արդարադատության նախարարության գլխավոր քարտուղար Սիրվարդ Գևորգյանը ընդգծեց, որ չնայած իրական շահառուների բացահայտման ոլորտում ունեցած հաջողություններին, ՀՀ կառավարությունը կարևորում է իրական շահառուների բացահայտման ինստիտուտի կատարելագործումը, տվյալների ճշգրտության ստուգման գործուն մեխանիզմների ներդրումը, որը հնարավորության կտա ապահովել ինստիտուտի առջև դրված նպատակների իրականացումը։