Արդյունահանող ճյուղերի թափանցիկության նախաձեռնության իրազեկման միջոցառումներ իրականցվեցին Սյունիքի մարզում

24.05.19
Արդյունահանող ճյուղերի թափանցիկության նախաձեռնության իրազեկման միջոցառումներ իրականցվեցին Սյունիքի մարզում

Շարունակելով Հայաստանի Հանրապետության արդյունահանող ճյուղերի թափանցիկության նախաձեռնության (ԱՃԹՆ) առաջին ազգային զեկույցին նվիրված իրազեկման միջոցառումները՝ մայիսի 23-ին և 24-ին հանդիպում-քննարկումներ իրականացվեցին Կապանում և Ագարակում։

Հանդիպում-քննարկումներին մասնակցեցին ՀՀ վարչապետի աշխատակազմի ԱՃԹՆ-ի քարտուղարության ղեկավար Լուսինե Թովմասյանը, ԱՃԹՆ քարտուղարության փորձագետ Անահիտ Առուստամյանը, ԱՃԹՆ-ի բազմաշահառու խմբի (ԲՇԽ) ՀՀ կառավարության ներկայացուցիչ  Տարածքային կառավարման և զարգացման նախարարի տեղակալ Լիլիա Շուշանյանը, ԲՇԽ արդյունահանող կազմակերպություններ ներկայացնող «Ագարակի պղնձամոլիբդենային կոմբինատ» ՓԲԸ-ի վարչական տնօրեն Արթուր Նիկողոսյանը և «Գեոմայնինգ» ՍՊԸ-ի գլխավոր տնօրեն Վահե Վարդանյանը, ԲՇԽ քաղաքացիական հասարակությունը ներկայացնող Երևանի պետական համալսարանի օգտակար հանածոների հանքավայրերի որոնման և հետախուզման ամբիոնի դոցենտ Հարություն Մովսիսյանը և «Հասարակական ձայն» հասարակական կազմակերպության խորհրդի անդամ Արթուր Համբարձումյանը: Հանդիպումներին մասնակցում էր նաև Համաշխարհային բանկի ներկայացուցիչ Նարինե Թադևոսյանը:

Այս հանդիպումներին ևս մարզպետարանների և համայնքապետարանների, քաղաքացիական հասարակության և հանքարդյունահանող ընկերությունների ներկայացուցիչներին ներկայացվեց նախաձեռնությունը, ԱՃԹՆ-ի առաջին ազգային զեկույցը, զեկույցով հասանելի դարձած տվյալները, մասնավորապես՝ ընդերքօգտագործման թույլտվությունները, մետաղական հանքաքար արդյունահանող ընկերությունների պայմանագրերը, մետաղական հանքարդյունաբերության ոլորտից համայնքի ստացած եկամուտները, ընկերությունների՝ համայնքի առջև սոցիալական պարտավորությունները։

Հանդիպումներին խոսեցին նաև ԱՃԹՆ-ի պաշտոնական կայքի` www.eiti.am և առցանց հաշվետվությունների հարթակի` reports.eiti.am միջոցով հասանելի դարձած տվյալների, իրական սեփականատերերի բացահայտմանն ուղղված ընթացիկ աշխատանքների, ինչպես նաև ոլորտային այլ հարցերի շուրջ։ 
Նշենք, որ Հայաստանում իրական սեփականատերերի բացահայտման գործընթացը սկսվել է ԱՃԹՆ ներդրման շրջանակում և մինչև տարեվերջ ստեղծվելու է մետաղական հանքարդյունաբերության ոլորտում գործող ընկերությունների իրական սեփականատերերի հանրային ռեգիստրը։

 Մարզային այցելությունները կազմակերպվել են Գերմանիայի միջազգային համագործակցության ընկերության կողմից իրականացվող «Աջակցություն գլոբալ Արդյունահանող ճյուղերի թափանցիկության նախաձեռնության իրականացմանը Հայաստանում, Վրաստանում և Ուկրաինայում» ծրագրի շրջանակում։ Ծրագիրն ամբողջությամբ ֆինանսավորվել է Գերմանիայի Դաշնային Հանրապետության «Հանրային վարչարարության բարեփոխումներ Արևելյան գործընկերության երկրներում»  նախաձեռնությամբ։